گوگڵ بۆ کارمەندەکانى: بگەڕێنەوە بۆ شوێنى کارەکانتان

کۆمپانیاى گوگڵ، کۆتایی بە بڕیارێکى خۆى دەهێنێت لەبارەى کاکردنى کارمەندەکانى بە شێوەى ئۆنلاین.

بەگوێرەى هەواڵێکى تۆڕى سی ئێن بی سی-ى ئەمریکى، کۆمپانیاى گوگڵ داواى لە کارمەندەکانى کردووە، لە 4ى نیسانەوە بگەڕێنەوە شوێنى کارەکانیان و بژاردەى کارکردن لەماڵەوە کۆتایی پێهاتووە.

تۆڕە ئەمریکییەکە ئەوەشى ئاشکراکردووە، جۆن کەیسی، جێگرى سەرۆکى کۆمپانیاى گوگڵ ئیمەیڵێکى بۆ کارمەندانى کۆمپانیاکە کردووە، لەنێو ئێمەیڵەکەدا هاتووە، “دوو ساڵى درێژخایەن و قورس تێپەڕین لەوکاتەى کە زۆربەى کارمەندەکانمان لەماڵەوە کاریان دەکرد، ئێستاش دەتوانین دەست بکەین بە شێوازى کارى تێکەڵ”.

شێوازى کارى تێکەڵ، دابەشکردنى رۆژانى هەفتەیە لەنێوان کارکردن لە ماڵەوە بەشێوەى ئۆنلاین و کارکردن لە ئۆفیس و شوێنى کار.

بە وتەى کەیسی، لەکۆى 156 هەزار و 500 کارمەندى کۆمپانیاکەیان، تەنها 14 هەزاریان بڕیاریان داوە بەشێوەى ئۆنلاین و لەماڵەوە کار بکەن.

هەر کارمەندێکیش هێشتا ئامادەساز نەبێت بۆ ئەوەى بگەڕێتەوە شوێنى کار، گوگڵ ڕێگاى داوە داواى کاتى زیاتر بکات لەماڵەوە بمێنێتەوە و خۆى ساز بکات.

کۆمپانیاکە پێشبینى ئەوەى کردووە، بەشێکى زۆرى کارمەندەکانى، ڕازى بن بەوەى لە هەفتەیەکدا سێ ڕۆژ بچنەوە سەرکار و دوو ڕۆژەکەى دیکەى هەفتەکەش بە شێوەى ئۆنلاین کار بکەن.