وەزیرى دارایی هەرێم 10 بڕیارى دەرکرد “بە ئامانجی بوژاندنەوەی جوڵەی بازرگانی و زیادكردنی داهات”

وەزیرى دارایی هەرێم لە گەرمیان زنجیرەیەک کۆبوونەوەى سازکرد، لە ئەنجامدا 10 بڕیارى دەرکرد بە مەبەستى زیادکردنى جوڵەى بازرگانى .

ئاوات شێخ جەناب، وەزیری دارایی و ئابوریی هەرێمی كوردستان، لە كۆبونەوەی لەگەڵ لایەنە پەیوەندیدارەكانی گەرمیان، 10 بڕیاری “بە ئامانجی بوژاندنەوەی جوڵەی بازرگانی و زیادكردنی داهات” دەركرد، وەک لە ڕاگەیەندراوێکى وەزارەتى داراییدا هاتووە.

بەگوێرەی راگەیەندراوەكە، بڕیارەکانى وەزیری دارایی بریتین لە؛

1- لەمەودوا بارەکانی ترانزێت کڵۆم دەکرێت و بەبێ مەئمور بەڕێدەکرێت.

2- بازرگانان ئازادن لە بازرگانیکردن و حساباتی ڕەسیدیان لەگەڵ ناکرێت.

3- لابردنی ڕەسید بۆ ھەمو ئەو بارانە كە لە دەروازەكان هاوردە دەكرێت.

4- پیاداچونەوە دەكرێت بۆ کەمکردنەوەی باجی گومرک.

5- پێداچونەوە بە لێخۆشبونی (202) ماددە کە حکومەتی عێراق لێخۆشبونی بۆ کردوە.

6- تەسریحەی گومرکی تەنھا یەک جار پارە وەردەگیرێت واتا لە دو بارە بونەوە هیچ بڕه‌ پارەیه‌ك وەرناگیرێت.

7- کرێی بارھەڵگرەکان مەرزی پەروێزخان ڕێکدەخرێتەوە.

8- پێداچونەوە بەکرێی پشكنینی كومپانیاكانی کوالیتی کۆنترۆڵی دەروازەكان دەکرێت.

9- پێداچونەوە بە پاراستنی بەروبومی ناوخۆیی دەکرێت لەگەل وەزارەتە پەیوەندیدارەكان.

10- لە سەر راسپاردەی وەزیری دارایی و ئابوری دابینکردنی 200 دۆنم زەوی بۆ کۆگاکانی بازرگانان كە ئەمیش دەبێتە هۆی رەخساندن 2000 هەلی كار بۆ ناوچەی گەرمیان.