کۆى داهاتى نەوتى فرۆشراوى عێراق لە ساڵى ڕابردوودا 75.6 ملیار دۆلار بووە
یەک ملیار و 100 ملیۆن بەرمیل نەوت هەناردە کراوە
جەگەر محەمەد
عێراق بە بەهای 75 ملیار و 600 ملیۆن دۆلار، نەوتى هەناردەى دەرەوە کردووە، وەک لە ڕاپۆرتێکى سۆمۆدا هاتووە.
کۆمپانیاى سۆمۆ، کە کۆمپانیایەکى نیشتمانییە و کارى بە بازاڕکردنى نەوتى عێراقە، لە ڕاپۆرتى ساڵى 2021دا ئاشکرایکردووە، لەو ساڵەدا کۆى نەوتى هەناردەکراوى عێراق یەک ملیار و 100 ملیۆن بەرمیل نەوت بووە کە 9.3% زیاترە لە ساڵى 2020، ناوەندی نرخى هەر بەرمیلێک 68 دۆلار و 62 سەنت بووە.
کۆمپانیاکە ئەوەشى خستوەتەڕوو، داهاتى نەوتى فرۆشراوى تەواوى ساڵەکە، 75 ملیار و 600 ملیۆن دۆلار بووە.
بەگوێرەى داتاکانى سۆمۆ، 97%ى نەوتى هەناردە کراو لە بەسڕەوە بووە، 3.23%ى نەوتى عێراق لەڕێی بەندەرى جەیهانى تورکیاوە هەناردەى بازاڕەکانى جیهان کراوە.
